Davvi Division

lea sámi multidáiddastudio man ulbmil lea leahkit sihke performancebáikin, hárjehallanbáikin ja oahpahusbáikin musihkkáriidda, dánsariidda ja muđui dáiddariidda.

Davvi Divisiona váldomihttu lea leahkit deaivvadanbáiki gos nuorra sápmelaččat galget dovdat oadjebassan dánsuma, musihka ja lávdedáidaga bokte.

Davvi Division lea maid Lounge Sámi (sámi livekonseapta) ruoktu, mii lágiduvvo okte mánus.

Davvi Division vuođđuduvvui 2021’s ja vuođđudeaddjit leaba dánsár Ánna-Katri Helander ja musihkkar Anthoni Hætta. Soai leaba goappašagat bajásšaddan Guovdageainnus ja leaba oahpuidgazzama maŋŋel máhccan fas ruoktot ja freelanceba goabbatge dáiddasuorggis ja bargaba kulturbargin. Studio ásaheigga dainna mihtuin ahte Davvi Division šattašii kultuvrralaš arena nuorra sámi dáiddáriidde gos sáhttá lágidit ovdanbuktimiin, kultuvrralaš dáhpáhusaid, čađahit sihke dánsun ja musihkka oahpahusa ja muđuid maid dáidagiin bargat. Davvi Division bargá dan ovdii ahte nuorra kulturberošteaddjit ja dáiddárat dovdet gullevašvuođa studioi iešguđet fálaldagaid bokte.

Oahpahus

Davvi Division lágida dánsunoahpahusa HipHop’as ovttas Kulturskuvllain. Dát fálaldagat leat 3. gitta 7. luohká ahkásaččaide, nuoraidskuvlla ohppiide ja joatkaskuvlla ohppiide. Čavčča 2023 lea maid álgán baleahtta fálaldat 6-9 jahkásaččaide ja 10-15 jahkásaččaide, dán oahpahusa láidesta Marit Bringedal Anti.
Dáid fálaldagaid lassin lea maid čoavjedánsunkursa rávisolbmuide.

Min facebook siiddus almmuhuvvojit dađistaga ođđa ja miellegiddevaš oahpahusfálaldagat, bargobájit ja lágideamit.

Kultuvrralaš Dáhpáhusat

Davvi Divisionis fállat olu iešguđetgelágan kultuvrralaš fálaldagaid mánáide, nuoraide, studeanttaide ja rávisolbmuide:

Lounge Sápmi, livekonseapta gos nuorra musihkkárat besset unna, liekkus lávddi alde ovdanbuktit iežaset musihka.
Skádja Club, alkoholkeahtes klubba nuoraidskuvlla ahkásaččaide. Dán lágidit ovttas suohkana SOMÁZ-joavkkuin (Guovdageainnu suohkana álbmotdearvvašvuođa joavku).
Nuoraid kafea, káfeafálaldat nuoraide nuoraidskuvlla agis ja joatkaskuvlla agis.
Nissonbeaivi, kultuvrralaš eahket nissonbeaivvi ávvun.