Lounge Sápmi lea erenoamáš sámi musihkkakonseapta gos (nuorra) sámi musihkkárat ja musihkkaberošteaddjit besset čuojahit lagaskonseartta liegga ja oadjebas birrasis, oahpásnuvvat eará musihkkáriiguin ja musihkkaberošteddjiiguin ja muđui vásihit ealas musihkka ja kulturbirrasa Guovdageainnus. Lounge Sámi váldoulbmil lea ráhkadit lávddi ja deaivvadanbáikki gos áidna ulbmil lea deaivvadit musihka vuođul.
Lounge Sápmi lágiduvvo juohke mánu, ja juohke geardde okta artista/joavku čuojaha lagaskonseartta. Maŋŋel konseartta lea álo jam-seššion. De sáhttá lávket lávdde nala ja čuojahit, lávlut, rohttet luođi dehe improviseret eará musihkkáriiguin.
Min luhtte lea álo liegga ja rabas vibe; ii galgga goassege ballat lávket lávdde nala dehe boahtit guldalit mii dáhpáhuvvá lávdde nalde. Mii háliidit buohkat loahpa loahpas dušše gullat ja vásihit musihkka.
Mii bovdet buot lágan musihkkáriid ja musihkkaberošteddjiid boahtit vásihit mii Lounge Sápmi lea! Sisabeassan lea álo nuvttá ja dan dihte go mis leat nuorra musihkkárat ja musihkkaberošteaddjit mii eat goassege guossot alkohola. Čuovo mielde min Facebook-siiddus goas boahtte Lounge Sápmi dáhpáhuvvá!
OVDDEŠ ARTISTAT:
Artistat ja bándat geat leat čuojahan Lounge Sámis leat:
Inger Karoline Gaup, Lávre, DJ iDJa, Saara Hermansson, SUNNA, Inger Marie Nilut, Elina Ijäs, Eppeti, The Limelounge, Georgi Mazev, K.ÓLA, IDK IDA, Dagur, Flaaryr, Bjarni, SAVZA, Máhtte Eira, Astrid Tuorda, Janita Risten, Ándaras.
Lea go dus hállu čuojahit Lounge Sámis?
Čális midjiide e-boastta: loungesapmi(at)gmail.com dehe čális dieđu Facebookas!
Lounge Sápmi + Island = Govhl, the cacophony
|
Lounge Sápmi + Island = Govhl, the cacophony |
“Lounge Sápmi + Island” lei musihkkaprošeakta gos 5 sámi musihkkára Lounge Sápmi fierpmádagas mátkkoštedje Islándii Reykjavíkii deaivvadit ja oahpásnuvvat 5 musihkkáriiguin Islánddas eret. Sii galge vahkkus ráhkadit doarvái musihka deavdit diimmu konseartta mii galggai čájehuvvot Nordisk Hus nammasaš visttis Islándda oaivegávpogis. Seammá Islándda musihkkárat bohte maid Guovdageidnui, gos seammá proseassa dáhpáhuvvi.
Dát konsearta gásttašuvvui Govhl, the cacophony ja čájehuvvui ja báddejuvvui Guovdageainnus njukčamánus 2022:is, Davvi Divisionis.
Prošeavtta váldoulbmil lei viiddidit sámi musihkkáriid fierpmadagaid, čájehit sámi kultuvrra olgoriikas ja seaguhit sámi musihkkaimpulssaid Islándda musihkkaimpulssaiguin. Boađus šattai diimmu konsearta gos davvisámegiella, lullisámegiella, islánddagiella, eŋgelasgiella, luohti ja vuelie seaguhuvvui. Musihkkárat čálle ieža visot bihtáid.
Čuovvovaš musihkkárat serve dán prošektii:
Sámis:
Anthoni Hætta, Inger Johanne Oskal, Saara Hermansson, Esben T. Andersen ja Elina Ijäs.
Islánddas:
Bjarni Daníel Þorvaldsson, Dagur Kristinn Sigurdsson, Ida Nielsen Juhl, Katrín Helga Ólafsdóttir ja Diego Leandro Manatrizio.
Lounge Sápmi + Island lea dán rádjái Lounge Sámi stuorámus prošeakta. Prošeaktajođiheaddjit leigga Anthoni Hætta ja Inger Johanne Oskal.
Prošeavtta doarjjui Kulturráđđi Norsk-islandsk kultursamarbeid ortnega bokte ja Sámediggi doarjjui kulturdoaibmabijut ortnega bokte. Hui ollu giitu!
DIGITÁLALAŠ JUOVLAKONSEARTA
|
DIGITÁLALAŠ JUOVLAKONSEARTA |
2021:s galggai lágiduvvot juovlakonsearta Lounge Sámis. Dađibahábut lei ain pandemiija ja ráddjejumit dihte ii lean vejolašvuohta čađahit dan. Muhto mii filbmiimet ja almmuheimmet njeallje lávlaga YouTube:ii.
Erenoamáš stuora giitosat Ándaras Leonardsenii, guhte filbmii!
Musihkkárat:
Anthoni Hætta - piáno
Inger Johanne Oskal - lávlun
Elina Ijäs - lávlun
Inger Gaup - lávlun
Ándaras Leonardsen - lávlun
Ville Söderbaum - saksofovdna ja vokala
LOUNGE SÁPMI BIRRA
Lounge Sápmi vuođđuduvvui popupkonseaptan 2019:is ja lea leamaš oassi Guovdageainnu kultureallimis dan rájes. Vuođđudeaddjit leat Anthoni Hætta, Inger Johanne Oskal ja Mette Irene Hætta. Lounge Sápmi fárrii sisa Davvi Divisionii 2021:is ja lea bistevaš konseartafálaldat dáppe.
Otná lágideaddjit leat Anthoni Hætta, Inger Johanne Oskal ja Ánna-Katri Helander.
Ruhtadeaddjit
Lounge Sápmi lea ožžon lágidandoarjaga (arrangørstøtte) Kulturráđis 2022 ja 2023 ovddas.
Lounge Sápmi lea ovdal ožžon doarjaga Sámedikkis ja Sámeráđis.
Ulbmil
Lounge Sámi váldoulbmil lea fátmmastit (nuorra) sámi musihkkáriid ja sin musihkkasurggiid ja leahkit lávdi gos sámi musihkka sáhttá čájehuvvot ja čuojahuvvot.
